Mic 6 | NdeIBE | STEP | Lalelani okutshiwo nguJehova ukuthi: “Sukumani lilandise indaba yenu phambi kwezintaba; amaqaqa kawezwe lokho elikutshoyo.

Micah 6

Icala lika-Israyeli kuJehova

1 Lalelani okutshiwo nguJehova ukuthi: “Sukumani lilandise indaba yenu phambi kwezintaba; amaqaqa kawezwe lokho elikutshoyo.

2 Zwanini, lina zintaba, icala elethulwa nguJehova; lalelani lina zisekelo zomhlaba ezingulaphakade. Ngoba kulecala uJehova alibeka ebantwini bakhe, wethesa u-Israyeli icala.

3 “Bantu bami, ngenzeni kini na? Ngilihluphe ngani na? Ngiphendulani.

4 Ngalikhupha eGibhithe ngalikhulula elizweni lobugqili. Ngathuma uMosi ukuba alikhokhele kanye lo-Aroni loMiriyamu.

5 Bantu bami, khumbulani izicebiso zikaBhalaki inkosi yaseMowabi lokuthi uBhalami indodana kaBhewori waphendula wathini. Khumbulani uhambo lwenu kusukela eShitimi kusiya eGiligali, ukuze lazi imisebenzi elungileyo kaJehova.”

6 Kuyini engizakuza lakho phambi kukaJehova ngikhothame phambi kukaNkulunkulu ophakemeyo na? Ngizakuza phambi kwakhe ngilomnikelo wokutshiswa, ngilamathole alomnyaka owodwa na?

7 UJehova angathokoziswa zinqama eziyizinkulungwane, izinkulungwane ezilitshumi zemifula yamafutha na? Ngizanikela izibulo lami ngenxa yokona kwami, isithelo somzimba wami ngenxa yesono somphefumulo wami na?

8 Ukutshengisile wena muntu okuhle. UJehova ufunani kuwe na? Ukwenza okulungileyo lokuthanda umusa kanye lokuhamba ngokuzithoba loNkulunkulu wakho.

Icala lika-Israyeli Lesijeziso

9 Lalelani! UJehova umemezela kulo idolobho – lokwesaba ibizo lakho kuyikuhlakanipha – “Qaphelani umqwayi laLowo owubekileyo.

10 Wena ndlu yobubi, kufanele lakhathesi ngiyikhohlwe inotho yakho eyazuzwa ngobubi, le-efa elinganelanga, elithukiweyo na?

11 Ngizamkhulula yini ecaleni umuntu olezilinganiso zobuqili, lesaka lezilinganiso zamanga na?

12 Abantu bakhona abanothileyo balochuku; abantu bakhona ngabaqambi bamanga, lezilimi zabo zikhuluma inkohliso.

13 Ngakho sengiqalisile ukukuchitha, ukukuqothula ngenxa yezono zakho.

14 Uzakudla kodwa ungasuthi; isisu sakho sizakuba silokhu singelalutho. Uzabuthelela kodwa ungalondolozi lutho, ngoba lokho okulondolozayo ngizakupha inkemba.

15 Uzalima kodwa ungavuni; uzakhama ama-oliva kodwa amafutha awo ungawagcobi, uzakhama amavini kodwa iwayini lawo ungalinathi.

16 Ugcinile imithetho ka-Omiri layo yonke imikhutshana yasendlini ka-Ahabi, walandela lamasiko abo. Ngakho-ke ngizakunikela ekubhujisweni, labantu bakho ekubeni yinhlekisa; uzathwala isigcono sezizwe.”